આજે જીવનમાં દરેક ચીજમાં અભાવ, અસમાનતા, ગળાકાપ હરીફાઈ અને માનવસમાજ માટે ક્યારેય ઉત્પન્ન ન થયેલી આટલી બિહામણી અચોક્કસ પરિસ્થિતિમાં માનવી સાચા જીવનથી દૂર થઈ રહ્યો છે, અને તેનાં મનમાં સતત દુ:ખ, ચિંતા, ઉદ્વેગ, મૂંઝવણ રહ્યા કરે છે. આવી પરિસ્થિતિમાં માણસે પોતાના પ્રશ્નો ઉકેલવા માટે જીવનમાં કયો દષ્ટિકોણ રાખવો જોઈએ અને કઈ રીતે Happy મનનું સર્જન કરવું જોઈએ તેની અદ્દભુત ચાવીઓ આ પુસ્તકમાં જણાવવામાં આવી છે. અહીં મહત્વનો સંદેશ એ છે કે જો તમે તમારી વિચારવાની રીતને સહેજ બદલશો તો જીવનના દુઃખી ખૂણાઓને તમે સુખદ ઘાટ આપી શકશો. નાની નાની વાતોમાં ગૂંચવાઈ જઈને અણમોલ રત્ન સમાન જીવનને ગુમાવી ને બેસવું જોઈએ. સૌથી મહત્વનું એ છે કે જીવન અણમોલ છે અને એટલી જ અણમોલ છે ખુશી. “Happy મનનું સર્જન” પુસ્તકમાં રોજબરોજના જીવનમાં ખુશહાલ રહેવા માટેની તમામ વ્યવહારિક વાતો કહેવામાં આવી છે. એક-બે પાનાંઓમાં કહેવાયેલી આ વાતો આપણને ખુશી કેવી રીતે મેળવવી, તેની રીત સહજતાથી સમજાવે છે. કોઈ પણ પાનાથી વાંચી શકાય તેવા આ પુસ્તકમાં ભારતીય પરંપરાની સુવાસ વણી લેવામાં આવી છે. જીવનબાગને ખુશીથી મઘમઘતો કરવા માગતી દરેક વ્યક્તિએ આ પુસ્તક પોતાના ઓશીકે રાખી મૂકવા જેવું છે.